Бішкекте өтіп жатқан 2026 жылғы көркем гимнастикадан Азия чемпионатында Қазақстан құрамасы алғашқы медалін еншіледі. Командалық жарыста қазақстандық гимнаст қыздар күміс жүлдеге қол жеткізді, деп хабарлайды Aqshamnews.kz тілшісі NUR.KZ-ке сілтеме жасап.
Командалық турнир қорытындысы жекелей және топтық сындардағы іріктеу нәтижелері бойынша анықталды. Қазақстан құрамасы сапында Айбота Ертайқызы төрт жаттығу бойынша 107,20 ұпай жинаса, Ақмарал Ерекешева 106,50 ұпай еншіледі. Ал топтық екі бағдарламада ұлттық құрама қоржынына 49,95 ұпай түсті.
Осылайша, Қазақстан құрамасының жалпы көрсеткіші 263,65 ұпайға жетіп, қыздар екінші орынға тұрақтады. Командалық күміс медаль Айбота Ертайқызы мен Ақмарал Ерекешевамен қатар Айзере Нұрмағамбетова, Айзере Кеңес, Кристина Чепульская, Аида Хакимжанова, Жасмин Джунусбаева және Мадина Мырзабайға табысталады.
Азия чемпионатында бірінші орынды 265,80 ұпаймен Өзбекстан құрамасы иеленді. Қытай спортшылары 262,85 ұпаймен үздік үштікті түйіндеді.
25 мамыр күні жекелей және командалық көпсайыс бәсекелері өтеді. Бұл сында Қазақстан құрамасының барлық өкілдері жүлде үшін таласады. Ал 26 мамырда спортшылар жекелеген жаттығулар финалында өнер көрсетеді.