Қазақстан Республикасының Бас прокуратурасы мен Ішкі істер министрлігінің қызметкерлері, Армения Республикасындағы Қазақстан Елшілігінің көмегімен, ауыр қылмыс жасаған күдіктіні Ереваннан экстрадициялады, деп хабарлайды aqshamnews.kz.
2024 жылғы қыркүйекте Петропавл қаласында бұрын бірнеше рет істі болған азамат мас күйінде бұзақылық ниетпен адамға бірнеше рет пышақ сұғып, оның өміріне қауіп төндірген. Жәбірленуші шұғыл медициналық көмектің арқасында аман қалған.
Қылмыстан кейін күдікті құқық қорғау органдарынан жасырынған, соның салдарынан оған халықаралық іздеу жарияланған. 2024 жылдың қазан айында ол Армения аумағында ұсталып, Қазақстан Бас прокуратурасының сұрауы бойынша елге экстрадицияланды.
Қазіргі уақытта күдікті уақытша тергеу изоляторына қамалды. Оған қатысты Қылмыстық кодекстің 24-бабы 3-бөлігі және 99-бабы 2-бөлігінің 9-тармағы бойынша (адам өлтіруге оқталу) іс қозғалған. Бұл бап бойынша мүлкін тәркілеумен бірге 15 жылдан 20 жылға дейін немесе өмір бойына бас бостандығынан айыру жазасы қарастырылған.