Денсаулық сақтау министрлігінде ведомство басшысының Субөңірлік үйлестірушімен және ҚР-дағы көші-қон жөніндегі халықаралық ұйымның (ХКҰ) миссиясының басшысы Серхан Ақтопырақ мырзамен кездесуі өтті.
Тараптар мигранттар мен босқындардың денсаулығы мәселесі бойынша өзара іс-қимыл мүмкіндіктерін, сондай-ақ Қазақстан аумағында ұзақ мерзімді болуды жоспарлайтын өтініш берушілер үшін көшпелі денсаулықты қарап-тексеру бағдарламасын талқылады, деп хабарлайды aqshamnews.kz ДСМ-ге сілтеме жасап.
Кездесу барысында атап өтілгендей, әлемдегі қазіргі заманғы сын-қауіптер мен төтенше жағдайлар жағдайында «барлығына денсаулық» қағидатын, оның ішінде босқындар мен көшіп-қонушылар үшін сақтау ерекше өзекті болып табылады.
Қолданыстағы заңнамаға сәйкес Қазақстан аумағында тұрақты тұратын көшіп-қонушылар, шетелдіктер және азаматтығы жоқ адамдар ҚР азаматтарымен тең дәрежеде ТМККК алуға құқылы.
Ел аумағында уақытша болғандарға келетін болсақ, оларға айналасындағыларға қауіп төндіретін аурулардың жекелеген жағдайларында ғана медициналық көмек алуға кепілдік беріледі. Бұл шара қоғамдық денсаулықты қамтамасыз етуге және ел халқына қауіпті аурулардың таралуын болдырмауға бағытталған.
Сонымен қатар, бұл санаттағы адамдар медициналық сақтандыру шарты шеңберінде медициналық көмектің белгілі бір түрлерін ала алады.
Денсаулық сақтау министрі Ақмарал Әлназарова көшіп-қонушылар мен халықтың мобилдік топтарына қатысты профилактикалық және емдеу шараларын күшейту бөлігінде ХКҰ бастамаларына қолдау білдіріп, осы саладағы одан әрі өзара іс-қимылдың маңыздылығын атап өтті.