БҰҰ мәліметінше, Қазақстан Online Service Index рейтингісінің үздік ондығына енді.
Бұл индекс онлайн-мемлекеттік қызметтердің қолжетімділігін, олардың алуан түрлілігі мен толықтығын – өтінім беру процесінен бастап нәтижелерді алуға дейінгі барлық кезеңдерді қамтиды.
2024 жылы рейтингтің көшбасшысы болып максималды ұпай жинаған Оңтүстік Корея танылды, ал тізімнің соңғы орнын ең төменгі көрсеткішпен Эритрея иеленді, деп хабарлайды Energyprom.
Қазақстан алғашқы ондықты түйіндеп, ТМД және Орталық Азия елдерінің барлығын басып озды, сондай-ақ технологиялық жетістіктерімен танымал Жапониядан сәл ғана артта қалды.
Салыстырып қарасақ, Армения 53-орында, Ресей – 56-орында, Өзбекстан – 59-орында, Қырғызстан – 89-орында болса, Түрікменстан рейтингтің соңында, 172-орында қалды.
Қазақстанда цифрландырудың үздік мысалдарының бірі – инженерлік желілерге қосылуға техникалық шарттар беру процесінің автоматтандырылуы. Бұл әдіс сыбайлас жемқорлық тәуекелдерін болдырмай, қазақстандықтарға «бір терезе» қағидаты бойынша қызмет алуға мүмкіндік береді.