22 мамырда Абай атындағы Қазақ ұлттық опера және балет театры Евгений Брусиловскийдің «Қыз Жібек» операсын ұсынады.
Бұл қойылым қазақ классикалық өнерінің негізін қалаған үш тұлғаның – Евгений Брусиловский, Қанабек Байсейітов және Құрманбек Жандарбековтің 120 жылдық мерейтойларына арналады. Қазақ опера өнерінің алтын қорына енген «Қыз Жібек» операсының премьерасы 1934 жылғы 7 қарашада өтті.
Бас партияларды орындаған Күләш Байсейітова, Құрманбек Жандарбеков пен Қанабек Байсейітов туындының музыкалық материалын таңдауда, сондай-ақ композиторға қазақ музыкасын меңгеруге көмектесті. Операның музыкасы халық фольклорына негізделген, 50-ден астам күй мен ән енген.
Алғашқы режиссерлер – Қанабек Байсейітов пен Жұмат Шанин, либретто авторы – Ғабит Мүсірепов.
«Қандай музыка жазсам да – қазақша шығатын» деген Евгений Брусиловскийдің шығармашылығы қазақ ұлттық операсы мен кәсіби музыкалық мәдениетінің дамуына зор үлес қосты. Ол – қазақ композиторлық мектебінің негізін қалаушылардың бірі, тұңғыш опералар мен симфониялардың авторы. Оның қаламынан тоғыз опера, төрт балет, тоғыз симфония және бес жүзден астам ән мен романс туған.
Сонымен қатар, ол 1945–1992 және 1992–2006 жылдар аралығындағы Қазақстан Республикасының Мемлекеттік әнұраны авторларының бірі.
Қанабек Байсейітов – Қазақ КСР-інің халық артисі, Мемлекеттік сыйлықтың лауреаты, қазақ музыкалық театры мен ұлттық опера өнерінің негізін қалаушылардың бірі. Режиссер, опера әншісі, драматург, театр және кино актері. 20-дан астам операны сахналап, 17 көркем фильмге түскен. «Абай» операсындағы Абай рөлі – шығармашылығының шыңы.
Құрманбек Жандарбеков – Қазақ КСР-інің халық артисі, актер, режиссер, ұстаз. Қазақтың кәсіби драма және музыкалық театрының негізін қалаушы. Абай атындағы театрдың құрылуына қатысқан. Жұбайы Шара Жиенқұловамен бірге қазақ би өнерін қайта жандандырып, ұлттық балеттерді сахналады. Ол 10 опера мен 3 балетті қойған, олардың қатарында қазақ балет өнеріндегі алғашқы туынды – «Қалқаман мен Мамыр» бар.