Қарағанды қаласында жеке тұрғын үйден ірі көлемде ұрлық жасаған ер адам бейнебақылау камераларына түсіп қалды, деп хабарлайды Aqshamnews.kz тілшісі.
Бейнежазбада күдіктінің түнгі уақытта зәулім үйден ақша мен құнды заттар салынған ауыр сейфті алып шыққаны көрінеді. Ер адам сейфті қар үстімен домалатып, бірнеше рет тоқтап, айналасына қарап отырған. Кейін оны қоқыс жәшіктерінің жанына жасырып, таңертең қайта келіп алып кеткен. Оның қозғалысы бірнеше бейнебақылау камерасына жазылған.
Үй иелері ұрлық фактісін бірнеше күннен кейін, шетелдегі ұзақ демалыстан оралған соң анықтаған. Олар сейфтің жоғалғанын байқап, полицияға жүгінген. Алдын ала мәлімет бойынша, келтірілген шығын көлемі шамамен 10 миллион теңге.
Қарағанды облыстық Полиция департаментінің хабарлауынша, жедел-іздестіру шаралары барысында күдікті қолға түскен. Ол Түркістан облысынан Қарағандыға келген 30 жастағы ер адам. Тексеру кезінде оның жалдамалы пәтерінен ұрланған сейф табылған.
«Сейф заттай дәлел ретінде тәркіленді. Күдікті кінәсін мойындады. Қазіргі уақытта сотқа дейінгі тергеу жүргізіліп, оның басқа да осыған ұқсас қылмыстарға қатысы бар-жоғы тексерілуде», – деп мәлімдеді полиция.
Айта кетейік, бұған дейін Қарағандыда қалта ұрлығына қатысты тағы бір бейнежазба әлеуметтік желіде тараған болатын. Аталған дерек бойынша да күдікті ұсталған.