Қарағандыда 17 жастағы жасөспірім ірі көлемдегі есірткімен қолға түсті. Тәртіп сақшыларының мәліметінше, ол есірткі қылмысына қарсы іс-шара барысында қоқыс полигоны маңында ұсталған, деп хабарлайды Aqshamnews.kz Қарағанды облыстық полиция департаментіне сілтеме жасап.
Тексеру кезінде жасөспірімнің қалтасынан заманауи гаджеттер – iPhone 14 және қылмыстық әрекетке қатыстылығын айғақтайтын хат-хабар сақталған iPhone 11 тәркіленді. Сонымен қатар қара изолентаға оралған, салмағы шамамен 15 грамм болатын 20 түйіншек табылды. Сараптама бұл заттың синтетикалық есірткі – «A-PVP» екенін анықтады.
Тергеу барысында ол қылмысын мойындап, бір жарым ай бұрын курьер-букмекер ретінде жұмыс істей бастағанын айтқан. Осы уақыт ішінде Қарағанды маңындағы жасырын қоймалардан 20-40 түйіншектен тұратын ірі партияны сегіз рет алып, Абай, Шахтинск және Қарағанды қалаларында есірткі таратқан.
Қазір қылмыстың барлық мән-жайын анықтауға және есірткі желісінің басқа қатысушыларын табуға бағытталған тергеу амалдары жүргізіліп жатыр. Полицияның айтуынша, мұндай шаралар аймақтағы есірткі қылмысымен күрестің тиімділігін көрсетеді.