13 қыркүйек күні Қарағандыда есірткі таралуына қарсы күрес пен салауатты өмір салтын насихаттауға арналған ауқымды акция өтті, деп хабарлайды aqshamnews.kz Қарағанды облысы ПД баспасөз қызметіне сілтеме жасап.
Іс-шараға 1000-нан астам адам қатысты. Олардың қатарында Қарағанды қаласы полиция басқармасының қызметкерлері, Б.Бейсенов атындағы Қарағанды Академиясының курсанттары, Жастар ресурстық орталығының еріктілері, қоғамдық көмекшілер, төрт ЖОО (ҚарМУ, ҚЭУ, ҚарМТУ, ҚМУ) студенттері және басқа оқу орындарының өкілдері болды. Қатысушылар есірткі заттарының жарнамасы бар заңсыз граффитиді өшіру және есірткіге қарсы жадынамалар мен буклеттер тарату үшін бірікті.
Акция барысында қатысушылар топтарға бөлініп, әр топ учаскелік полиция инспекторларының басшылығымен белгіленген секторларда жұмыс істеді. Іс-шараның нәтижесінде қала аумағындағы 4200-ден астам заңсыз жазулар мен суреттер өшіріліп, 3000-нан астам жадынамалар мен буклеттер таратылды.
Қарағанды облысы полиция департаменті бастығының орынбасары, полиция полковнигі Әбіл Әбілдиннің айтуынша, жыл басынан бері полиция қызметкерлері есірткі сатқаны үшін 71 қылмыстық іс қозғаған, оның 40-ы граффити арқылы жасалған жарнамаға қатысты. Сонымен қатар, есірткі заттарын таратумен айналысқан 53 адам ұсталған, олардың ішінде екі жүкті әйел, көп балалы ана, төрт студент және сегіз кәмелетке толмаған жасөспірім болған.
Жыл басынан бері полиция қызметкерлері 10 000-ға жуық есірткі жарнамасы бар граффитиді өшірген. Полковник Әбілдин граффити арқылы есірткіні жарнамалағаны үшін 3 жылдан 6 жылға дейін бас бостандығынан айыру жазасы қарастырылғанын атап өтті.