Қарағанды облысының Шет ауданында бірнеше күн бойы іздестірілген 72 жастағы ер адам өлі табылды, - деп хабарлайды aqshamnews.kz тілшісі.
Зейнеткер 18 желтоқсанда жылқы іздеу үшін жеке автокөлігімен шығып, байланысқа шықпай қалған. Туыстары оның жоғалғаны туралы хабар бергеннен кейін ауқымды іздестіру жұмыстары басталды.
Іздеу жұмыстарына Қарағанды облысы ТЖД құтқарушылары, полиция қызметкерлері, №52859 әскери бөлімнің әскери қызметшілері, еріктілер мен марқұмның туыстары жұмылдырылған. Аумақты әуеден "Қазавиақұтқару" тікұшағы шолып, дрондар мен Starlink спутниктік байланысы қолданылған. Іздеу топтары ықтимал бағыттарды тексеріп, қолжетімі қиын аумақтарды тәулік бойы қараған.
23 желтоқсанда ер адам Ағадыр кентінен шамамен 35 шақырым қашықтықта, Ортау ауылына апаратын далалық жолда, қарға көміліп қалған автокөліктің ішінде өлі табылған. Марқұм жүргізуші орнында болған, зорлық-зомбылық белгілері анықталмаған.