"Алматы Тазалық" МКК арнайы техникасының жүргізушісі Қанат Нүсіпжан алматылықтарды қар тазалау кезінде жолдан машиналарын алып тастауға шақырды
Алматыда қар тазалау жұмыстары күн-түн демей жалғасуда. «Алматы Тазалық» мекемесінің арнайы техника жүргізушісі Қанат Нүсіпжанның айтуынша, қызметкерлер түннен бері тынымсыз жұмыс істеуде.
— Қар жауа бастаған сәттен-ақ жолдарды тазалауға кірістік. Бар күшімізді салып, қаланы қардан тазартуға тырысып жатырмыз. Алайда негізгі қиындық – қар тазалайтын жерлерге адамдар көліктерін қалдырып кетеді. Бұл жұмыстарды қиындатып, уақытты ұзартады. Біз амалын тауып, айналып өтсек те, тұрғындардан көліктерін уақытша жылжытып қоюларын сұраймыз, — деді Қанат Нүсіпжан.
Мамандар қыс мезгілінде қала тазалығын қамтамасыз ету үшін тұрғындардың түсіністік танытуын өтінеді.