Синоптиктер 16–18 желтоқсан аралығына арналған ауа райы болжамын жариялады. Мамандардың айтуынша, алдағы күндері Қазақстанның басым бөлігі арқылы ауқымды циклон өтеді, деп хабарлайды AqshamNews.kz тілшісі.
Болжамға сай, ел аумағының көп бөлігінде қар жауып, бұрқасын соғады. Ал оңтүстік пен оңтүстік-шығыста жауын-шашын жаңбыр мен қар түрінде түсіп, көктайғақ болуы ықтимал. Таулы өңірлерде де бұрқасын күшейеді.
Республика бойынша екпінді жел күтіледі: жылдамдығы 15–20 м/с-қа дейін, кей аумақта 23–28 м/с-қа дейін күшеюі мүмкін. Оңтүстік және оңтүстік-шығыс аймақтарда түнде және таңертең тұман түсуі ықтимал.
Температуралық фон да құбылады. Батыс өңірлерде түнде ауа температурасы -10…-18°С-тен -3…-13°С-қа дейін өзгеріп, күндіз -15…0°С-тен +5…-3°С-қа дейін көтеріледі. Солтүстік, орталық және шығыста түнгі ауа температурасы -7…-15°С-тен -12…-28°С-қа дейін төмендеп, күндіз -5…-15°С шамасынан -8…-18°С-қа дейін суытады. Оңтүстік пен оңтүстік-шығыста түнде -3…-11°С-тен -5…-20°С-қа дейін төмендеп, күндіз -5…+2°С-тен -1…-13°С-қа дейін ауытқуы мүмкін.