Қонаев қаласының тұрғыны Андрей Козятинский Қапшағай су қоймасында суға батып бара жатқан адамды құтқармақ болып, қаза тапты, – деп хабарлайды aqshamnews.kz тілшісі.
Қайғылы жағдай туралы қала әкімі Асхат Бердіханов әлеуметтік желідегі парақшасында хабарлады.
Әкімнің айтуынша, Андрей Козятинский өз қауіпсіздігін ойламай, көмекке мұқтаж адамды құтқаруға ұмтылған.
«Андрей Филипович Козятинскийдің Қапшағай су қоймасында басқа адамды құтқаруға әрекет жасау кезінде қайғылы қазаға ұшырағаны туралы хабарды терең күйзеліспен қабылдадым. Оның бұл әрекеті ерлік пен жанқиярлықтың, адамгершіліктің айқын үлгісі болды. Шешуші сәтте Андрей шетте қалмай, өз өміріне қауіп төніп тұрғанына қарамастан, көмекке ұмтылды. Мұндай қадамға жүрегі үлкен, мінезі мықты адам ғана бара алады», – деп жазды әкім.
Асхат Бердіханов қала тұрғындарының атынан марқұмның әкесіне, бауырына, туыстары мен жақындарына көңіл айтты. Оның ерлігі Қонаев тұрғындарының жадында мәңгі сақталатынын атап өтті.
«Андрейдің батылдығы мен өзгенің өмірін құтқару үшін өзін құрбан етуге дайын болуы – шынайы ерлік пен адамгершіліктің үлгісі», – деді қала әкімі.
Төтенше жағдайлар департаментінің мәліметінше, оқиға 2026 жылғы 22 шілдеде демалыс орындарының бірінде болған. Алдын ала ақпарат бойынша, бір адам суға батып кеткен. Оны құтқармақ болған демалыс базасының қызметкері де қаза тапқан.