Алматының орталығында Алмалы ауданының 90 жылдығына арналған мерекелік флешмоб өтті, – деп хабарлайды aqshamnews.kz тілшісі.
Қазақстан-Британ техникалық университетінің алдындағы алаңда 45 жұп түлек бір мезетте вальс билеп, қала тұрғындары мен қонақтарына көтеріңкі көңіл күй сыйлады.
Іс-шара соңғы қоңырау қарсаңында өтіп, түлектердің балалық шақпен қимастықпен қоштасуын бейнелеген символдық көрініске айналды. Қойылым соңында қатысушылар аудан мерейтойының құрметіне «90» санын бейнелеп сап түзеді.
Идея авторы — №62 гимназия жанындағы «Наргиз» хореографиялық ансамблінің жетекшісі Михриниса Ибрагимова.
«Түлектерге де, туған Алмалы ауданына да, барша алматылықтар мен қала қонақтарына да ерекше тарту жасағымыз келді», — дейді ұстаз.
Оқушылар қойылымға бірнеше ай бойы тыңғылықты дайындалып, би қимылдарының үйлесімі мен нақышын жетілдірді. Көптеген қатысушы үшін бұл вальс сахнадағы алғашқы үлкен тәжірибе болды.
«Дайындыққа екі ай уақытым кетті. Бұрын вальс билей алмайтынмын, бірақ тез үйреніп алдым. Осындай әдемі флешмобқа қатысып, достарыммен бірге уақыт өткізгеніме қуаныштымын. Бұл өмірдегі қайталанбас кезең», — дейді Ілияс Жансүгіров атындағы №130 гимназияның 11-сынып оқушысы Даяна Дүсенғали.
Мерекелік іс-шара түлектер үшін есте қаларлық әсер сыйлап қана қоймай, мектепке, туған ауданға және Алматыға деген алғыс пен сүйіспеншіліктің көркем көрінісіне айналды.
Алмалы ауданы 1936 жылғы 14 қыркүйекте құрылып, әр кезеңде атауы өзгеріп отырған. Қазіргі атауын аудан 1995 жылы 12 желтоқсанда алды. Бүгінде ол Алматының маңызды білім беру, мәдени және іскерлік орталықтарының бірі саналады.