Талдықорғанда полицейлер түнде жасөспірім жүргізген көлікті қуып жүріп тоқтатты, деп хабарлайды Aqshamnews.kz тілшісі Polisia.kz-ке сілтеме жасап.
16 қарашаға қараған түні, шамамен 03:00-де патрульдік полиция қызметкерлері Қабанбай батыр көшесінде жылдамдықты шамадан тыс асырып, қауіпті маневр жасаған Mitsubishi Pajero көлігін тоқтатпақ болды. Алайда жүргізуші тәртіп сақшыларының тоқтау туралы заңды талабын елемей, жылдамдықты арттырып, қашуға тырысқан.
Патрульдік экипаж дереу қуғынды бастап, ақпаратты басқа нарядтарға жолдаған. Бірнеше минутқа созылған қудалау нәтижесінде көлік көпқабатты үйдің ауласында бұғатталып тоқтатылды.
Тексеру кезінде көлікті 2009 жылы туған, жүргізуші куәлігі жоқ жасөспірім басқарғаны анықталды. Ол ұсталып, полиция бөліміне жеткізілді. Оқиға туралы оның ата-анасына хабарланды. Көлік арнайы айыптұрағына қойылды.
Жасөспірімге қатысты:
-
полицейдің заңды талабына бағынбау,
-
жүргізуші куәлігінсіз көлік жүргізу
фактілері бойынша материалдар сотқа жіберілді.
Сонымен бірге, ата-анасына қатысты:
-
баланың түнде ересектердің қарауынсыз жүрмеуін қамтамасыз етпеу,
-
тәрбиелеу жөніндегі міндеттерін тиісінше орындамау
бойынша әкімшілік хаттамалар толтырылды.
Полиция жасөспірімнің қасында тағы үш кәмелетке толмаған досы болғанын анықтады. Олардың ата-аналарына да балалардың түнгі уақытта қараусыз жүргені үшін әкімшілік протоколдар рәсімделді.
Оқиға бойынша тергеу шаралары жалғасып жатыр.