Алматыдағы Сайран көлінің жағасында өтіп жатқан тазалық акциясына танымал өнер иелері мен қоғам қайраткерлері қатысып жатыр. Олардың қатарында ҚР еңбек сіңірген қайраткері, халықтың сүйікті әншісі Жұбаныш Жексенұлы да бар. Ол табиғатты аялау - әрбір азаматтың парызы екенін айтып, көпшілікті қоршаған ортаға ұқыппен қарауға шақырды, деп хабарлайды, Aqshamnews.kz тілшісі.
"Қала жалғыз, біз көппіз. Егер әр адам өзінен бастап тазалыққа мән берсе, мұндай сенбіліктерге жиі қатысса, Алматы одан әрі ажарлана түсер еді. Табиғат - бізге берілген аманат. Сайран сияқты көрікті жерлерді таза ұстау — болашақ ұрпақ алдындағы жауапкершілік. Қолымызда бар алтынды бағалай білейік", – деді әнші.
Оның айтуынша, таза ортада ғана шығармашылық та, руханият та дамиды. "Мәдениетті адам - ең алдымен табиғатты ластамайтын адам" деген Жұбаныш Жексенұлы бұл бастамаға барша алматылықтарды белсене шақырды.