Алматыдағы Мемлекеттік қуыршақ театры қызметкерлерінің жалақысы 30%-ға өсті, ал 16 маман Канада, Ресей және Қырғызстанның жетекші театр мектептерінде біліктілігін арттырды.
Сондай-ақ, 15 қызметкер мемлекеттік бағдарлама аясында баспаналы болды. Бұл шаралар театр труппасының кәсіби деңгейін көтеруге және оның халықаралық аренадағы беделін нығайтуға бағытталған. Бұл туралы театр директоры Алмат Амангелді Өңірлік коммуникациялар қызметінде өткен брифинг барысында мәлімдеді, деп хабарлайды aqshamnews.kz.
Мемлекеттік қуыршақ театры – талантты әртістер мен мамандар үшін жаңа мүмкіндіктер алаңы. 2024 жылы 16 театр қызметкері Канада, Ресей және Қырғызстанда біліктілігін жетілдіріп, озық тәжірибелерді меңгерді.
«Біз театрдың ең басты құндылығы – ондағы адамдар деп білеміз. Театр қызметкерлерінің кәсібилік деңгейі қаншалықты жоғары болса, біздің қойылымдарымыз да соншалықты сапалы әрі әсерлі болмақ», – деді Алмат Амангелді.
Театр қызметкерлерінің жалақысының 30%-ға өсуі – мәдениет саласындағы мекемелер үшін айтарлықтай жетістік. Сондай-ақ, 15 қызметкер мемлекеттік бағдарлама аясында тұрғын үймен қамтылды.
2023-2024 жылдары театр ғимараты ауқымды жаңғыртудан өтті. Сахна, көрермен залы, грим бөлмелері мен гардеробтар толықтай жаңартылып, заманауи дыбыс, жарық және сахналық технологиялар орнатылды. 2024 жылы театр фойесінің қайта жөндеуден өтуі аяқталып, LED-экран мен жаңа жиһаз қойылды.