Еуропалық футбол қауымдастықтары одағы (УЕФА) Шерхан Қалмұрзаның есімін Чемпиондар лигасының үздіктері қатарына енгізді, - деп хабарлайды Аqshamnews.kz тілшісі.
УЕФА-ның баспасөз қызметі ең үздік сейвтердің топтамасын жариялады. Жазбада олар жанкүйерлерден ұсынылған сейвтердің ішінен ең үздігін таңдауды сұрады. Топ-5 қатарына алматылық команданың 18 жастағы қақпашысының сейві де кірді. Шерхан Қалмұрза "Спортингке" қарсы матчтың бесінші минутында-ақ команданы голдан құтқарып қалған болатын.
Шерхан Қалмұрзадан бөлек үздіктер қатарына "Галатасарай" қақпашысы Угурджан Чакыр, "Наполи" мүшесі Ваня Милинкович-Савич, "Ньюкасл" голкипері Ник Поуп және "Спортинг" қақпашысы Жуан Виржиния кірді.
Айта кетейік, Шерхан Қалмұрза - "Қайраттың" үшінші қақпашысы. Ол негізгі құрамға Александр Заруцкий мен Темірлан Анарбеков жарақат алған соң шықты. Кешегі Лиссабондық "Спортингке" қарсы матчта Қалмұрза ЧЛ-дегі дебюттік матчына шықты.