14 қыркүйекте Алматыда өткен "Қайрат" пен "Ақтөбе" арасындағы ойынның 10-минутында алматылық клубтың негізгі қақпашысы Темірлан Анарбеков ауыр жарақат алып, алаңнан зембілмен шығарылды, деп хабарлайды Aqshamnews.kz тілшісі.
"Қайраттың" бас бапкері Рафаэль Уразбахтиннің айтуынша, Анарбековтің жақ сүйегі сынған:
"Менің ойымша, Темірланның жақ сүйегі сынған. Ол белгісіз уақытқа дейін ойынға қатыса алмайды. Ол алдағы Чемпиондар лигасы мен 2025 жылғы КПЛ ойындарына қатыса алмайды", - деді Уразбахтин.
Соған қарамастан, "Қайрат" "Ақтөбені" 1:0 есебімен жеңіп, маңызды үш ұпайға ие болды. Бұл ойында қақпаны алғаш рет қорғаған 18 жастағы Шерхан Қалмұрза сенімді ойын көрсетіп, өз қақпасын соққылардан сақтап отырды.
Қазақстан құрамасы мен "Қайраттың" қақпасын қорғап жүрген 21 жастағы Анарбеков кейінгі уақытта нағыз жұлдызға айналған еді. Ол 27 тамызда өткен УЕФА Чемпиондар лигасының плей-офф кезеңінде "Селтикке" қарсы матчта үш бірдей пенальтиді қайтарып, командасын тарихта алғаш рет топтық кезеңге шығарды. Сол ойыннан кейін жанкүйерлер оны "қаһарман" деп атап кеткен.
Айта кетейік, "Қайрат" енді Чемпиондар лигасының топтық кезеңінде алғаш рет өнер көрсетпек. Алматы клубы 30 қыркүйекте өз алаңында әйгілі "Реал Мадридті" қабылдайды.