Бүгін Мемлекет басшысы Қасым-Жомарт Тоқаевтың төрағалығымен Үкіметтің кеңейтілген отырысы өтті. Онда еліміздің 2024 жылғы әлеуметтік-экономикалық дамуына қорытынды жасалынып, биыл атқарылуы тиіс міндеттер жүктелді.
Жалпы мұндай форматтағы жиын елдегі жағдайды бақылауда ұстау және қысқа уақытта атқарылуы тиіс шаруаларды пысықтауға мүмкіндік береді. Сондықтан саяси тұрғыдан бізге ұнасын, ұнамасын осындай жиындар өтуі қажет.
Үкімет отырысының мазмұнына келер болсақ, онда Премьер-министр Олжас Бектенов, Премьер-Министрдің орынбасары Серік Жұманғарин, Ұлттық банк төрағасы Тимур Сүлейменов, «Самұрық-Қазына» АҚ басқарма төрағасы Нұрлан Жақыпов, Астана қаласының әкімі Жеңіс Қасымбек, Шымкент қаласының әкімі Ғабит Сыздықбеков, Қызылорда облысының әкімі Нұрлыбек Нәлібаев баяндама жасады. Кабмин басшысы өткен жылға қорытынды жасап, биыл атқарылатын шаруалар туралы баяндады. Оның орынбасары Серік Жұманғарин қаржы-экономикалық саланы дамыту бойынша Үкіметтің ұсыныстарын айтты.
Баяндамашылардың сөзінен кейін президент Үкімет пен өзге де мемлекетік органдарға бірнеше тапсырма берді. Басым көпшілігі былтырғы жолдаудағы тапсырмаларды орындау бойынша тактикалық мәселелерді қамтыған. Президент әсіресе экономиканы әртараптандыруда инвестициялық климатқа баса назар аударған. Осы бағытта өңдеу өнеркәсібі, туризм және өзге де салаларға басымдық беруді тапсырды. Барлық міндеттер биыл жылдың соңына дейін орындалуы тиіс. Сондықтан мемлекет басшысы Үкімет мүшелерінен шешім қабылдауда батылдық танытуды талап етті.
.