Қазақстанда Перизат Қайраттың атышулы ісіне байланысты қайырымдылық қорларының жұмысына қойылатын талаптар күшейтіле ме? Бұл сұраққа премьер-министр Олжас Бектенов жауап берді, - деп хабарлайды aqshamnews.kz.
"Қазір Перизат Қайратқа қатысты даулы, резонансты іс қаралып жатыр. Осы жағдайдан кейін қайырымдылық қорлары мен халықтан қаражат жинаумен айналысатын ұйымдарға қойылатын талаптарға өзгерістер енгізіле ме?" – деп сұрады үкіметтегі брифингте тілшілер.
Олжас Бектенов бұл жағдайдан хабардар екенін айтты.
"Иә, әрине, бұл жағдаймен таныспын. Өкінішке қарай, мақсатсыз жұмсалатын тек бюджет қаржысы емес, азаматтардан жиналған қайырымдылық қаражаты да бар. Бұл – соның айқын мысалы. Және жалғыз мысал емес, басқа да оқиғалар болған. Бірақ бұл – ең шулы іс шығар", – деді премьер-министр.
Бектеновтың пікірінше, Қазақстанға қаражат жинауға қатысты заңнамалық өзгерістер қажет. Бұл қаражаттың жұмсалуын есепті, бақылаулы әрі ашық етуге мүмкіндік береді.
"Құқық қорғау органдары бұл ұрлықтың нақты қандай жолмен жасалғанын анықтап береді деп ойлаймын. Осыдан кейін осындай құқықбұзушылықтардың алдын алу мақсатында заңнамалық түзетулер енгізуге болады", – деп қосты Үкімет басшысы.