Павлодар қаласындағы №26 мектепте математика пәнінің мұғалімі 15 жастағы оқушының арқасына ине шаншып, үлкен жанжал тудырды. Бұл оқиға сабақ үстінде, оқушы тақтада жауап беріп тұрған кезде болған, деп хабарлайды Aqshamnews.kz
Зардап шеккен оқушының әпкесінің айтуынша, оның інісі тәртіпті, оқу үлгерімі жақсы бала. Ал 23 жастағы мұғалім өз әрекетін түсіндіре алмаған.
«Ол бізге бұл қылығын түсінбейтінін айтты. Егер ине арқылы ауру жұқса ше? Енді бізге үш ай бойы тексеріліп тұру керектігін ескертті. Бұл өте қорқынышты», – дейді әпкесі.
Оның айтуынша, мектептің беделі бұрыннан нашар. Ата-аналар мекемедегі тәртіпсіздік пен мұғалімдердің әрекетіне жиі шағымданатын көрінеді.
«Бұл мұғалім оқушыларға физикалық қысым көрсетіп, олардың шашынан ұстап, кемсітетін сөздер айтатын», – дейді ол.
Мектеп директоры Гүлмира Ниязбекова мұғалімнің жұмыстан босатылғанын хабарлады. Бірақ оқушыға шабуыл жасауға қолданылған иненің қайда екені белгісіз. Қазіргі уақытта полиция тергеу жүргізіп жатыр.