Парижде Рождество мерекесі қарсаңында тұңғыш рет экосыйлықтар жәрмеңкесі ашылды.
Онда көненің көзіндей бұйымдарға жаңа өмір сыйланған түрлі әшекейлер мен тұрмыстық заттар қойылған. Биылғы жаңа жыл париждіктер үшін ерекше сыйлықтармен есте қалмақ, деп хабарлайды aqshamnews.kz 24.kz-ке сілтеме жасап.
Елдегі ең ірі қайырымдылық ұйымдардың бірі бастама көтеріп, алғаш рет қайта өңделген сыйлықтар жәрмеңкесі ұйымдастырылды. Бұл базарлықтарды дайындау үшін Францияның түкпір-түкпіріндегі шеберлер екі ай бойы тынымсыз еңбек еткен.
Латифа Лальми, тігін ательесінің шебері: - Қазір Рождестволық жәрмеңкелер маусымы. Сондықтан жұрт жақынына сыйлық аламын деп біраз шығындалады. Осы ретте біз оларға қайта өңделген заттың не екенін айтқымыз келді.
Жәрмеңке сөрелерінен түрлі кәдесыйларды да табуға болады. Олардың арасында журналдардан жасалған орындықтар, Париж Олимпиадасы кезінде стадионның төбесін жапқан брезенттен тігілген сөмкелер мен ескі жемпірлерден жасалған ойыншықтар бар. Осындай ерекше сыйлықтарға сатып алушылар тарапынан асқан қызығушылық байқалады.
Маэль, сатып алушы: - Ескі бұйымдарға жаңа өмір сыйлау идеясы өте керемет. Сонымен қатар осы жоба арқылы өңірлердегі азаматтарды жұмыспен қамту жағы да ұнады. Сондықтан осы бір керемет идеяны қолдау мақсатында келіп тұрмын.
Әлеуметтік әрі экологиялық мәні бар сыйлықтарды сатып алу париждіктердің көңілінен шықты. Сондықтан жәрмеңке Рождество мерекесі аяқталған соң да жалғасын таппақ.