Желіде «Отбасы банк» клиенттерінің жеке деректері жарияланды және банктің IT жүйесінде іркіліс болды деген ақпарат тараған еді. Осыған орай мекеменің баспасөз қызметі түсінік берді.
«Банкте клиенттердің жеке деректерінің сақталуы - алғышарт. Біз жеке деректерді және ақпаратты қорғау саласындағы заңнаманың бүкіл талаптары мен нормаларын қатаң сақтаймыз. Сәйкесінше, Отбасы банкіндегі деректердің сыртқа жарияланып кеткені туралы ақпарат шындыққа жанаспайды Сондай-ақ, банкте IT жобалар жұмысында іркіліс болған жоқ. Банк қалыпты жұмыс істеп тұр. Қазіргі уақытта «Отбасы банк» АҚ 2023 жылға дейінгі даму стратегиясын жүзеге асырып жатыр», - делінген ресми түсініктемеде.
Стратегияның мақсаты - банк қызметінде алдыңғы қатарлы технологияларды енгізу және автоматтандыру арқылы клиенттерге қызмет көрсету операцияларын 100% онлайн режимге көшіру.
«Кез келген тексерудің қорытындысы бойынша акт жасалады. Сондай-ақ, оны орындау бойынша іс-шаралар жоспары құрылып, оны орындау барысы қадағаланады. Тексеру нәтижесі бойынша жекелеген тапсырмаларды орындамаған жағдайда қызметтің жекелеген салаларына жетекшілік ететін банк қызметкерлеріне тәртіптік жауапкершілік қарастырылуы мүмкін»,- дейді банктен.
Хабарламада айтылғандай, тәртіптік жауапкершілікке тарту туралы шешімді банктің директорлар кеңесі қабылдайды.
Сондай-ақ, аталған банк қазір «Аудиторлық бақылау туралы» заңды іске асыру бойынша іс-шаралардың орындалып жатқанын хабарлап отыр.