Партиялық тізімге 90 адам енгізілген.
Орталық сайлау комиссиясы Amanat партиясының алдағы Мәжіліс сайлауына партиялық тізім бойынша ұсынған кандидаттарын тіркеді, деп хабарлайды Almaty-akshamy.kz
Орталық сайлау комиссиясының хатшысы Мұхтар Ерманның айтуынша, Amanat партиясының партиялық тізіміндегі 90 адамның 29-ы – әйелдер, қалғаны - жастар мен мүгедектігі бар адамдар. Бұл тізімге енгізілген кандидаттардың жалпы санының 32,2%-ін құрайды.
"Орталық сайлау комиссиясы өкілетті мемлекеттік органдармен бірлесіп, мәжіліс депутаты болып сайлану үшін партиялық тізімге енгізілген кандидаттардың Конституция мен "Сайлау туралы" заңның талаптарына сәйкестігіне тексеріс жүргізді. Партиялық тізімге енгізілген барлық адам Конституция және "Сайлау туралы" Конституциялық заңның талаптарына сәйкес келеді", - деді Ерман.
Заңнамаға сәйкес, саяси партия партиялық тізімге енгізілген әрбір адам үшін сайлау жарнасын төлеуі керек. Ол ең төменгі жалақының 15 еселенген мөлшеріне, яғни 1 050 000 теңгеге тең.
Алайда Парламент Мәжілісінің алдыңғы сайлауында дауыс беруге қатысқан сайлаушылардың 5 және одан көп даусын алған саяси партиялар сайлау жарнасын төлемейді.
"2021 жылғы 10 қаңтарда өткен Мәжіліс сайлауында Amanat (бұрынғы "Нұр Отан") партиясы сайлаушылардың 71,9 пайыз даусын жинады. Осыған байланысты Amanat партиясы сайлау жарнасын төлеуден босатылады", - деді ОСК хатшысы.