«Орхан» ЖШС-не қатысты қылмыстық іс қозғалды

Алматы әкімі Ерболат Досаев Бостандық ауданының тұрғындарымен кездесуінде ауданның өзекті мәселелерінің бірі – ықшамауданды жарық пен сумен қамтамасыз ету бойынша қызмет көрсететін «Ерменсай» ЖШС «Водснаб қалалық су құбыры кәсіпорны» қызметінің сапасы төмендігі екенін айтты, деп хабарлайды Almaty-akshamy.kz.

Бұрын бұл кәсіпорын «Орхан» ЖШС деп аталған.

Әкімнің айтуынша, 20 маусымда Бостандық аудандық полиция бөлімі кәсіпорынның заңсыз әрекеті фактісі бойынша қылмыстық іс тіркеген.

«Ол мезгіл-мезгіл атауын өзгертіп отырады, бүгінде біз олар үшін тынымсыз жарыстамыз. Биылғы жылдың наурыз айында жүргізілген тексерулердің нәтижесінде Табиғи монополияларды реттеу комитетінің департаменті аталған кәсіпорынның қызметінде заң бұзушылықтарды анықтады. Тиісінше, 120 млн теңге көлемінде айыппұл салынды», - деді Ерболат Досаев.

Ол әкімдік жүргізген келіссөздерден кейін 26 маусымнан бастап 4,4 шақырымдық әуе электр желісін қала балансына беру жұмыстары жүргізіліп жатқанын атап өтті.

Жоғарыда аталған аумақта су тапшылығы бірнеше жылдан бері жалғасып келеді. Ерболат Досаевтың келуімен Алматы әкімдігі «Орхан» ЖШС-не қатысты сот ісін қайта бастау туралы бастама көтерді. Бірақ инженерлік коммуникацияларды қала балансына өтеусіз беру ісі әлі де жалғасуда.

Қазақстан Республикасының «Табиғи монополиялар туралы» Заңының 11-бабының 6-тармағында көзделген құқықты пайдалануға сәйкес кәсіпорын тұрақты түрде өзінің тіркелген жерін Алматыдан Алматы облысына және Астана қаласына ауыстырады. Осылайша, «Орхан» ЖШС бақылау және құқық қорғау органдарымен өзара әрекеттесуден қашады.