Еңбек және халықты әлеуметтік қорғау министрлігі Мәжіліс депутатының сауалына берген жауабында еліміздегі ішкі көші-қон көрсеткіштерін жариялады, - деп хабарлайды Aqshamnews.kz.
Ұлттық статистика бюросының 2025 жылдың алғашқы 9 айындағы деректеріне сәйкес, Қазақстанда 1 млн 326 мың адам қоныс аударған. Оның 619 мыңы облыстар арасындағы көші-қонды құрайды. Бұл көрсеткіш 2024 жылдың осы кезеңімен салыстырғанда 22,7 пайызға артып, өткен жылғы 1 млн 80 мың адаммен салыстырғанда айтарлықтай өсімді көрсетіп отыр.
Министрлік мәліметінше, ерікті түрде қоныс аудару тетігі бүгінде оңтүстік өңірлерден солтүстік аймақтарға еңбек ресурстарын қайта бөлуге бағытталған маңызды құралға айналған. Бағдарлама жұмыс іздеп жүрген азаматтар мен жұмыссыздарды жұмыспен қамтуға мүмкіндік беріп отыр.
Аталған бағдарлама іске қосылғалы бері солтүстік өңірлерге 66,2 мың адам көшіп барған. Олардың 3,6 мыңы немесе 6 пайызы кейін кері қайтқан.