Бүгін елімізде Құрылтай депутаттарының сайлауы өтіп жатыр, – деп хабарлайды aqshamnews.kz тілшісі.
Ел өміріндегі маңызды қоғамдық-саяси науқаннан Қазақстан Республикасы Ұлттық ұланының әскери қызметшілері де қалыс қалмай, таңдау жасады.
Ұлттық ұланның «Оңтүстік» өңірлік қолбасшылығына қарасты әскери бөлімдеріндегі сайлау учаскелері таңғы сағат 06:00-де жұмысын бастады.
Құқықтық тәртіп әскерінің жеке құрамы дауыс беруге белсенді қатысып, қызметтік-жауынгерлік міндеттерінің ерекшелігіне байланысты сайлау учаскелерінде дауыс беру мерзімінен бұрын аяқталды.
Алматыдағы 5571 әскери бөлімінде орналасқан №107 сайлау учаскесіне алғашқылардың бірі болып «Оңтүстік» өңірлік қолбасшылығының қолбасшысы генерал-майор Сәкентай Шекарбеков келіп, дауыс берді.
Жалпы, «Оңтүстік» өңірлік қолбасшылығына қарасты әскери бөлімдерде Отан алдындағы борышын өтеп жүрген әскери қызметшілер әскери қалашықтар аумағында орналасқан 9 сайлау учаскесінде дауыс берді.
Дауыс берушілер арасында сайлауға алғаш рет қатысқан жас сарбаздар да бар. 18 жасқа толып, тұңғыш рет дауыс беру құқығына ие болған әскери қызметшілерге естелік сыйлықтар табысталды.
Солардың бірі 5571 әскери бөлімінде мерзімді әскери қызметін өткеріп жүрген қатардағы жауынгер Марғұлан Құралбай.
– Алғаш рет сайлауға қатысып отырмын. Отанымыздың болашағына бей-жай қарай алмаймын. Тәуелсіз Қазақстанның азаматы ретінде елімізде оң өзгерістер болғанын қалаймын. Сондықтан бүгін азаматтық парызымды орындап, еліміздің болашағы үшін таңдау жасадым, – дейді жас сарбаз.
Құқықтық тәртіп әскерінің жеке құрамы қоғамдық-саяси науқанға қатысумен қатар, өздеріне жүктелген қызметтік-жауынгерлік міндеттерін жалғастырып келеді.