Париж Олимпиадасының қола жүлдегерлері Ғұсман Қырғызбаев пен Ле Александра Алматыдағы экологиялық марафон – плоггингке қатысты.
Спорт пен экология – бір-бірімен тығыз байланысты. Бұл қағиданы Олимпиада жүлдегерлері өз ісімен дәлелдеді. Париж Олимпиадасының қола жүлдегері, дзюдошы Ғұсман Қырғызбаев “Таза қала” акциясына қатысып, өз мектебінің маңын тазалауға атсалысты.
“Ұлы істер кішкентай қадамнан басталады. Бүгін біз Алматы қаласында “Таза қала” акциясына қатысып, өз мектебіміздің айналасын тазаладық. Бұл іс өзімізден кейінгі ұрпаққа үлгі болса екен деймін”, – деді Ғұсман.
Ле Александра да қоршаған ортаны қорғаудың маңыздылығын атап өтті. Ол бұл акцияның Алматы қаласының тұрғындары үшін ерекше рөл атқаратынын айтты:
“Алматы – біздің ортақ үйіміз. Мен бұл акцияға қатысып жатқаныма өте қуаныштымын. Осындай шараларды ұйымдастыру өте маңызды. Егер әрбір тұрғын қала тазалығына үлес қосса, өмір сүру әлдеқайда жайлы болар еді. Спортпен айналысып, таза қалада серуендегенге не жетсін!” – деді Олимпиада жүлдегері.
Экологиялық марафон – тек қаланы тазарту ғана емес, сонымен қатар салауатты өмір салтын насихаттаудың бір жолы. Осындай бастамалар арқылы танымал спортшылар жастарға дұрыс үлгі көрсетіп, қоршаған ортаны қорғауға деген жауапкершілікті арттыруға ықпал етеді.Бұл акция – табиғатқа деген қамқорлықтың, белсенді өмір салтының және болашақ ұрпаққа қалдырар таза әлемге деген ниеттің көрінісі.