Ақтау қаласының бұрынғы Назарбаев резиденциясы тұрған жер енді мешіт пен теңіз вокзалына айналады. Иә, қателеспедіңіздер, бұрынғы мемлекеттік нысанның орнына көпфункциялы «бақыт мекені» салынбақ. Бұл туралы Маңғыстау облысының әкімі Нұрдәулет Қилыбай халықпен кездесуде мәлімдеді, деп хабарлайды aqshamnews.kz
Бір кездегі резиденцияның жері халыққа уәде етілгендей балаларға арналған нысандар үшін пайдаланылуы керек еді. Бірақ, таңғаларлық жағдай, жер бір күнде «жеке меншіктің құшағына» еніп кеткен. Әкімнің айтуынша, бұл қазір қайтадан мемлекеттік баланста. Ал енді жоспар бойынша, стадион, мешіт, балалар алаңдары, теңіз вокзалы, тіпті шағын және орта бизнес нысандары да салынады. «Енді бұл жер кімге тиесілі екенін сұрамай-ақ қойыңыздар, бәрібір өзгеріп кетуі мүмкін», — деген ой туады.
Бірақ ең қызығы, мемлекеттік сараптама нәтижелері тек 2025 жылдың наурызында дайын болады екен. Яғни, қазірден бастап арманға шомылып, теңіз жағасындағы мешітке келіп дұға оқып, балалар алаңында ойнап, теңіз вокзалынан катерге отырып кетуді көз алдарыңызға елестете беріңіздер.