Бүгін Алматы әкімі Ерболат Досаев Наурызбай ауданы тұрғындарымен кездесті.
Тұрғындармен кездесуде ауданның жол инфрақұрылымы мен қоғамдық көлікті дамытуда қандай істер атқарылып жатқаны айтылды, деп хабарлайды Almaty-akshamy.kz.
Бұрын-соңды асфальт болмаған "Ақжар" шағынауданында жыл басынан бері жалпы ұзындығы 13 км болатын 27 көшеге асфальт төселуде. Бүгінгі таңда ұзындығы 6,7 км болатын 19 көше асфальтталды. Қараша айының соңына дейін тағы 8 көшеде жұмыстар аяқталады.
"Ақжар" шағынауданында жалпы ұзындығы 45 км болатын 89 көшеге жаңадан жол салу жоспарланған.
«Сондай-ақ 30 көшедегі ұзындығы 23 км орташа жөндеу жұмыстары аяқталды. Қараша айының соңына дейін ұзындығы 7 км тағы 8 көше жөнделеді.
«Алма Сити-5» тұрғындарының өтініштерін ескере отырып, әкімдік Алатау даңғылындағы магистралды жол арқылы тұрғын үйге оңай жету үшін 86 сотық жер сатып алып, жол салды», - деді қала басшысы.
Осы учаскеде жаңа №44 автобус іске қосылды.
Сондай-ақ, биылғы қараша айының соңына дейін Төле би көшесінің Алатау даңғылынан Жүнісов көшесіне дейінгі бөлігінің құрылысы аяқталмақ. Яссауи көшесінен қала шекарасына дейін 270 жер учаскесі алып қоюға жатады, оның 59-ы сатып алынды және 93-і бойынша жұмыс жүріп жатыр.
«Тұрғындарға қызмет көрсету сапасы мен жайлылығын арттыру мақсатында 8 маршрут ұзартылып, жаңартылды, сондай-ақ "Қалқаман", "Қарағайлы", "Шұғыла" және "Абай саяжайлары" шағынаудандарында 12 аялдама кешені орнатылды», - деді қала әкімі Е.Досаев.
Жаяу жүргіншілер қауіпсіздігін қамтамасыз ету үшін Шаляпин мен Сәбденов көшелерінде реттелетін екі бағдаршам және жалпы аудан бойынша 86 жол белгісі орнатылды.