Алматы облысында TikTok желісінде Наурыз мерекесіне қатысты жарияланған видеоға байланысты діни алауыздықты қоздыру фактісі бойынша қылмыстық іс қозғалды, – деп хабарлайды aqshamnews.kz тілшісі.
Полиция мәліметінше, 23 наурыз күні әлеуметтік желілерге жүргізілген мониторинг барысында TikTok платформасында жарияланған видео анықталған. Онда Наурыз мерекесіне қатысты діни және этномәдени сипаттағы жария пікірлер айтылған.
Жедел іс-шаралар барысында 1991 жылы туған күдікті анықталып, ұсталды. Кейін ол уақытша ұстау изоляторына қамалды. Қазір қажетті тергеу амалдары жүргізіліп жатыр. Тергеу мүддесіне байланысты өзге мәліметтер жарияланбайды.
Бұған дейін интернетте ер адамның Наурызды Қазақстанға жат мереке деп сипаттап, оны Валентин күнімен салыстырған видеосы тараған болатын. Сондай-ақ ол бұл мейрамды «Парсыдан келген пұтқа табынушылық ғұрып» деп атаған.