"Отбасы банк" шілде айында несие беруін тоқтатқан "Наурыз" бағдарламасын тағы жандандырды, деп хабарлайды aqshamnews.kz
Аталған банк Қазақстан қор биржасында (KASE) 150 миллиард теңге тартқанын және несие беруді қайта бастағанын сүйіншіледі.
– Бағдарлама шарттары өзгеріссіз қалды: бастапқы жарна кемінде – 20%, қарыздың ең жоғары сомасы Астана мен Алматыда – 36 миллион теңге, өзге өңірлерде – 30 миллион теңге. Жылдық тиімді сыйақы мөлшерлемесі – 9,6%-дан 13%-ға дейін. Несиені өтеу мерзімі – 19 жыл, – делінген ресми хабарлама мәтінінде.
Айта кетелік, "Наурыз" бағдарламаларының шарттары төмендегідей:
алғашқы жарна: таза әрлеудегі тұрғын үй сатып алу кезінде 10%-дан және әрленбеген немесе қайталама нарықтағы тұрғын үй сатып алу кезінде 20%-дан бастап;
тұрғын үй кезегінде тұрған азаматтардың әлеуметтік осал санаттары үшін кредит бойынша мөлшерлеме – 7% (ЖТСМ 7,1%-дан 9,6% дейін);
азаматтардың барлық санаты үшін кредит бойынша мөлшерлеме – 9% (ЖТСМ 9,4%-дан 13% дейін);
несие мерзімі – 19 жылға дейін.
Бағдарламаға қатысты барлық өзекті мәлімет "Отбасы банкінің" ресми интернет-ресурстарында жарияланады. Бұған дейінгі мақұлданған өтінімдер мен пәтер броньдары күшінде қалады.