Мәжіліс депутаты Мұрат Әбенов жол ережесін өрескел бұзатын жүргізушілерге қатысты жазаны қатаңдатуды ұсынды, деп хабарлайды Aqshamnews.kz тілшісі.
Оның айтуынша, камера арқылы салынатын айыппұл қарапайым халыққа салмақ түсіргенімен, ауқатты жүргізушілерге айтарлықтай әсер етпейді. Депутат кейбір жүргізушілер айыппұлды «жол ақысы» сияқты көріп, ереже бұзуды тоқтатпайтынын айтты.
Сондықтан ол қала ішінде рұқсат етілген жылдамдықтан 60 км/сағ артық асқан жүргізушілерді мас күйде көлік айдағандармен теңестіріп, куәлігінен айыруды ұсынды. Сондай-ақ мұндай жағдайда 15 тәулікке қамау, ал қайталанса өмір бойына көлік жүргізу құқығынан айырып, 50 тәулікке қамау мәселесін көтерді.
Мұрат Әбенов көше жарысын жеке құқықбұзушылық ретінде заңға енгізу қажет екенін айтты. Оның сөзінше, негізгі мақсат айыппұл жинау емес, жолдағы қауіпсіздікті күшейту болуы тиіс.