Ұлттық Miss Qazaqstan 2025 сұлулық байқауы биыл ерекше форматта өтеді. Ақтық кезең Алматы метрополитенінде, нақтырақ айтқанда – Мұхтар Әуезов атындағы станцияда ұйымдастырылады. Бұл туралы байқау директоры Айжан Рузаева Өңірлік коммуникациялар қызметінде өткен баспасөз конференциясында мәлімдеді.
Оның айтуынша, метро – қатынас құралы ғана емес, мәдени өзгерістер мен урбанистиканың нышаны. Сол себепті байқаудың биылғы тақырыбын «Таңдау еркіндігі» деп қойған.
«Алматының метросы - мәдени алаң да. Біз байқауды халыққа жақын еткіміз келеді. Архитектура мен қалалық атмосфера аясында өтетін финал нағыз есте қаларлық оқиға болмақ», - деді Айжан Рузаева.
Биылғы Miss Qazaqstan шоуы сұлулық, сән, технология мен қала атмосферасын біріктірмек. Ұйымдастырушылар Мұхтар Әуезов атындағы станцияны бекер таңдамағанын айтады. Метро – түрлі оқиғалар мен тағдырлар да тоғысқан жер.
Спикерлердің айтуынша, іріктеу 15 қалада өтіп жатыр. Қатысушыларға тек сыртқы сұлулық емес, ішкі әлемі, белсенділігі мен көзқарасы бойынша да талап қойылады.
«Бізге жай ғана сұлу қыз емес, ойы терең, шабыттандыра алатын, қазіргі қазақ әйелінің бейнесін - еркін, батыл әрі саналы тұлғасын көрсете алатын арулар қажет», - деді ұйымдастырушылар.
Байқаудың PR-менеджері Құралай Құрман финал өтетін орынның ерекшелігіне де тоқталды.
«Miss Qazaqstan байқауын сән сахнасы етіп қана қоймай, әркім өзін көрсететін, шабыт сыйлайтын еркін алаңға айналдырғымыз келеді. Сұлулық деген – шектеу емес, адам өз ойындағысын ашық айтатын үлкен мүмкіндік те екенін де қоғамға жеткізбекпіз», - дейді ол.
Miss Qazaqstan 2025 байқауының мәресі жай ғана сән шарасы емес, нағыз мәдени манифест болмақ. Көркем сахна, цифрлық технологиялар, жанды музыка мен ерекше сәулет тоғысатын бұл оқиғаны қала тұрғындары да тамашалай алады.