Қазақстан Республикасы Жазушылар одағының төрағасы Мереке Құлкенов жаңа Конституцияның күшіне енуін Қазақстан тарихындағы маңызды әрі тағдырлы оқиға деп бағалады, – деп хабарлайды aqshamnews.kz тілшісі.
Оның айтуынша, жаңа Конституция еліміздің мыңжылдық тарихы мен ұлттық құндылықтарын жаңа мазмұнда айқындап, мемлекеттіліктің идеологиялық негіздерін нығайтады.
«Бүгін – Қазақстан халқы үшін ерекше күн. Жаңа Конституциямыз күшіне еніп отыр. Бұл құжат елдің тарихи сабақтастығын, ұлттық бірегейлігін және болашақ алдындағы жауапкершілігін айқындайтын маңызды құжатқа айналады», – деді Мереке Құлкенов.
Жазушылар одағының төрағасы Конституцияның преамбуласында халқымыздың мыңжылдық тарихына ерекше мән берілгенін атап өтті. Оның пікірінше, бұл елдің ұлттық идеологиясын қалыптастырудағы маңызды қадам.
«Бұған дейін ұлттық идеология мәселесі жиі көтеріліп келді. Ал жаңа Конституцияда бұл бағыт өз орнын тапты. Мыңжылдық тарихымызға сүйену, ұлттық құндылықтарды сақтау және Жаңа Қазақстан қағидаттарын орнықтыру – Ата заңның маңызды ерекшеліктерінің бірі», – деді ол.
Мереке Құлкенов жаңа Конституция заң үстемдігін күшейтіп, қоғамда тәртіп пен жауапкершілік қағидаттарын орнықтыруға ықпал ететініне сенім білдірді.
«Заң үстемдігі орныққан жерде әділеттілік те, тәртіп те болады. Конституцияның басты мақсаты – қоғамда өзара құрметті, жауапкершілікті және заңға бағыну мәдениетін қалыптастыру», – деді ол.
Сонымен қатар ол Конституцияны елдің ұлттық коды ретінде бағалап, жаңа реформалардың қоғамның бірлігі мен мемлекет дамуына серпін беретінін айтты.
«Бұл Конституция – біздің ұлттық кодымыз. Ол Қазақстан халқын ортақ құндылықтар төңірегіне біріктіріп, елдің аумақтық тұтастығын, қоғамдық келісім мен отаншылдық рухын нығайтуға қызмет етеді. Бүгіннен бастап Жаңа Қазақстанның жаңа кезеңі басталады. Сондықтан 1 шілде еліміздің тарихында алтын әріппен жазылатын күндердің бірі болады», – деп түйіндеді Мереке Құлкенов.