2015 жылғы 23 қарашадағы №416-V ҚРЗ «Қазақстан Республикасының мемлекеттік қызметі туралы» Заңына сәйкес, мемлекеттік қызмет – бұл мемлекеттік қызметшілердің мемлекеттік органдарда мемлекеттік биліктің міндеттері мен функцияларын іске асыруға бағытталған лауазымдық өкілеттіктерді атқаруы.
Мемлекеттік қызметтің құқықтық негізін Қазақстан Республикасының Конституциясы, Қазақстан Республикасының Еңбек кодексі, жоғарыда аталған Заң, сондай-ақ басқа да нормативтік құқықтық актілер құрайды.
Мемлекеттік қызметші өз өкілеттіктерін адал және кәсіби түрде жүзеге асыруы тиіс. Ол кез келген жағдайда халықтың, ел азаматтарының сенімін жоғалтпай жұмыс істеуі керек. Осы мақсатта мемлекеттік қызметшілердің негізгі міндеттері айқындалған.
Мемлекеттік қызметшілердің негізгі міндеттері:
- Қазақстан Республикасының Конституциясы мен заңдарын сақтау;
- Азаматтар мен заңды тұлғалардың құқықтарын, бостандықтары мен заңды мүдделерін қорғау және олардың өтініштерін заңнамада белгіленген тәртіппен қарау;
- Лауазымдық міндеттерді тиімді орындау үшін кәсіби деңгейін және біліктілігін арттыру;
- Лауазымдық өкілеттіктерді жүзеге асыру кезінде саяси партиялардан, қоғамдық және діни бірлестіктерден бейтарап және тәуелсіз болу;
- Қызметтік тәртіпті сақтау және заңмен қорғалатын құпияны сақтау;
- Азаматтардың жеке өміріне қатысты ақпаратты жарияламау;
- Мемлекеттік мүліктің сақталуын қамтамасыз ету және оны тек қызметтік мақсатта пайдалану;
- Сыбайлас жемқорлық құқық бұзушылық жағдайларын хабарлау және олардың алдын алу;
- Қызметтік әдепті сақтау;
- Мемлекеттік органның ақпараттық қауіпсіздігін қамтамасыз ету.
Мемлекеттік қызметшілердің басқа да міндеттері Қазақстан Республикасының заңдарында және Қазақстан Республикасы Президентінің актілерінде көрсетілуі мүмкін.
Мемлекеттік қызметшілер адал қызмет атқару арқылы мемлекеттік қызметтің беделін арттырып, халықтың сенімін нығайта алады. Мемлекет қызметін нығайтуға, заңдылықтың сақталуына және қоғамның өркендеуіне әрбір мемлекеттік қызметші өзінің үлесін қосуы тиіс.