Мемлекет басшысы Олжас Сүлейменовті құттықтады, – деп хабарлайды aqshamnews.kz тілшісі.
"Құрметті Олжас Омарұлы!
Сізді мерейлі 90 жасқа толған мерейтойыңызбен шын жүректен құттықтаймын!
Сіз Қазақстанда және әлемдік деңгейде көрнекті ақын, ойшыл, беделді қоғам қайраткері ретінде зор құрмет пен лайықты мойындауға ие болдыңыз.
Сіздің гуманистік идеяларыңыз ұлттық мәдениет пен қоғамдық-саяси ойдың асыл қазынасына айналып, мемлекетіміздің шекарасынан тыс жерлерге де кеңінен таралды. Өзгеше шығармашылығыңыз арқылы қазақ халқының тарихи санасының жаңғыруына өлшеусіз үлес қостыңыз.
Өзіңіз негізін қалаған халықаралық «Невада – Семей» қозғалысы Қазақстанда және бүкіл әлемде ядролық сынақтарды тоқтату, ядролық қарусыздану идеясын және Жердің бейбіт болашағы үшін жаһандық жауапкершілікті насихаттау жолында өз үнін батыл жеткізді.
Дипломатиялық қызметте Сіз ұлттық мүдделерді лайықты қорғап, Қазақстанның халықаралық аренадағы беделін нығайтуға зор еңбек сіңірдіңіз.
Сіздің өмір жолыңыз – Отанға адалдықтың, жоғары азаматтық ұстанымның және жалпыадамзаттық құндылықтарға берік болудың жарқын үлгісі.
Құрметті Олжас Омарұлы!
Сізге зор денсаулық, бақ-береке және қайталанбас талантыңызды қадір тұтатын жұртшылықтың қуанышына ұзақ ғұмыр тілеймін.
Қасым-Жомарт Тоқаев", -деп жазылған Президенттің құттықтау хатында.
Алматы қаласының әкімі Дархан Сатыбалды Қазақстанның халық жазушысының шаңырағына барып, ел Президенті Қасым-Жомарт Тоқаевтың құттықтау хатын оқып берді.