Алматыдағы «Alem» инновациялық шығармашылық орталығында «Мектептегі өзін-өзі басқарудың үздік сайлау жүйесі» ІІ қалалық байқауы ұйымдастырылды.
Байқау Алматы қаласы мәслихаты мен қалалық Білім басқармасының қолдауымен өткізілді. Дүниежүзілік сайлау күнін мерекелеу аясында өткен «Мектептегі өзін-өзі басқарудың үздік сайлау жүйесі» ІІ қалалық байқауы мектеп оқушыларының демократиялық процестерге қатысуын ынталандыруға, сондай-ақ өзін-өзі басқару дағдыларын дамытуға бағытталған.
Мақсат – өзін-өзі басқару жүйесі ең тиімді жұмыс істейтін мектепті анықтау. Сондай-ақ, оқушылардың Қазақстан Республикасының сайлау заңнамасы мен сайлау жүйесінің ерекшеліктері бойынша құқықтық сауаттылығын және хабардарлығын арттыру.
Әділқазылар алқасы – Алматы қаласы аумақтық сайлау комиссиясының төрағасы Айгүл Оразқызы, «Alatau Aqparat» медиахолдингінің Бас директоры Ержан Қалымбайұлы, Алматы қаласы Қоғамдық кеңесі мүшесі Бекнұр Қисықов, Қазақстан Республикасы Президентінің жанындағы Мемлекеттік басқару академиясының Алматы қаласы бойынша филиалының директоры Айнұр Маратқызы, мәслихат депутаты Асқар Қуандықұлы, «Алматы аманаты» дарынды балалар мен талантты жастарды анықтау және қолдау орталығының әдіскері Анар Тойлыбаева, Сайлау жүйесінің ардагері Құралай Күмісбаева.
2025 жылғы 21–30 қаңтар аралығында Алматы қаласының мектептерінен байқауға қатысу үшін 160 өтінім берілді, бұл жалпы мектептер санының 74,4%-ын құрайды (барлығы 215 мектеп). Байқауға 143 мектеп жұмыс ұсынды (өтінімдердің 89,4%-ы), ал байқауға 127 мектеп қатысты (өтінімдердің 79,4%-ы). Әр ауданның байқау жұмыстары көрсетіліп, ұжымдық өнер көрсету, қорытындылау және жеңімпаздарды дипломдармен және бағалы сыйлықтармен марапаттау шаралары ұйымдастырылды. Барлығы 127 мектептің 835 өзін-өзі басқару өкілі қатысты, бұл өткен жылмен салыстырғанда, 23 мектепке көп. 31 қаңтарда байқаудың аудандық кезеңдері өтті.
Байқаудың ақтық кезеңіне аудандық кезеңдерден жеңімпаз болған 8 мектеп өтті. Дәлірек, «Алатау ауданы: №204 жалпы білім беретін мектеп», «Алмалы ауданы: №96 жалпы білім беретін мектеп», «Әуезов ауданы: №175 «Жаңа ғасыр» гимназиясы», «Бостандық ауданы: №105 О.Жандосов атындағы гимназия», «Жетісу ауданы: №102 жалпы білім беретін мектеп», «Медеу ауданы: Ш.Уәлиханов атындағы №12 мамандандырылған гимназия», «Наурызбай ауданы: №200 мектеп-гимназия», «Түрксіб ауданы: №59 мектеп-гимназия».
Байқау жоғары дәрежеде өтті. Мектептегі өзін-өзі басқарудың ең тиімді сайлау жүйесі бар мектептер анықталды.
БАЙҚАУ ЖЕҢІМПАЗДАРЫ:
1-орын – «№200 мектеп-гимназия» КММ;
2-орын – «Жаңа ғасыр №175 гимназия» КММ;
3-орын – «№102 жалпы білім беретін мектеп» КММ.
Бекнұр КИСИКОВ, Алматы қаласы Қоғамдық кеңесінің мүшесі:
Отаншылдық, патриоттық сезімге тәрбиелейді
Мұндай байқаулардың мән-маңызы жоғары. Бұл жас өрендерді отаншылдық, патриоттық сезімге тәрбиелейді. Сондай-ақ, оқушылар мектептен бастап болашақ қоғамдық өмірге белсене араласуға дағдыланады. Халықтың қалаулысы болу екінің бірінің қолынан келе бермейтін іс. Сондықтан ел игілігі жолында жалынды жастардың білімі, күш- жігері қажет.