Чехияның Мост қаласында «U Kojota» мейрамханасында күшті жарылыс болды, нәтижесінде алты адам қаза тапты, тағы сегіз адам жарақат алды, деп хабарлайды aqshamnews.kz.
Оқиға түнгі 23:00 шамасында болған. Бұл уақытта мейрамхананың асхана бөлігі жабылған екен. Бірақ ресторанға келушілер толығымен шығып үлгермеген.
Чехияның өрт қызметінің әлеуметтік желіде жариялаған мәлімдемесіне сәйкес, келеңсіз оқиғаның себебі газ баллонының жарылуы болған. Мұнда газ баллонды жылытқыш үшін пайдаланған. Жарылыс нәтижесінде өрт шыққан.
Өртсөндірушілер отты сөндіргеннен кейін, құтқарушылар қираған ғимараттың астынан алты адамның денесін тапты. Жараланған сегіз адамның алтауы ауыр халде болған, олар Прага ауруханаларына жеткізілді. Полиция оқиғаның себептерін анықтау үшін тергеу жүргізуде.
Чехияның ішкі істер министрі Вит Ракушан атап өткендей, өртсөндірушілер мейрамханадан және оған жақын орналасқан тұрғын үйден шамамен 30 адамды құтқарып қалған.