Сенат депутаты Айнұр Арғынбекова денсаулық сақтау саласындағы кадр тапшылығының өте өзекті мәселе екенін атап өтті. Осыған байланысты, ол Қазақстанда қандай мамандар жетіспейтінін де атап көрсеткен, деп хабарлайды aqshamnews.kz.
Депутаттың пікірінше, мамандар жетіспеушілігі тек ауылдық жерлерде ғана емес, елорда мен облыстарда да байқалады. Бүгінде денсаулық сақтау саласына үлкен көлемде қаржы бөлінгеніне қарамастан, халықтың толық сұранысын қанағаттандыру мүмкін болмай отыр. Көптеген медициналық ұйымдар материалдық-техникалық жағынан жеткілікті қамтамасыз етілсе де, «Бәрін кадр шешеді» деген ұстанымның маңыздылығы әлі де сақталуда, – деді ол.
Денсаулық сақтау министрлігінің мәліметі бойынша, 2023 жылдың соңында 4 864 дәрігер тапшылығы анықталған. Әсіресе, Астана, Алматы және Шымкент қалаларында дәрігер тапшылығы байқалады, сондай-ақ бірнеше ауыл мен аудандарда да маман жетіспеушілігі бар.
Қазіргі таңда сұранысқа ие мамандықтар қатарына терапевтер, анестезиологтар және акушер-гинекологтар жатады. Сенатор Денсаулық сақтау министрлігіне осы мәселені шешу үшін нақты шаралар қабылдауды ұсынды.
Айнұр Арғынбекова Денсаулық сақтау министрлігіне кадр ресурсы мәселесі бойынша «Халық денсаулығы және денсаулық сақтау жүйесі туралы» кодекске өзгерістер енгізу жөніндегі заңнамалық акт жобасын Парламентке тез арада ұсынуды, денсаулық сақтаудың тиімді кадр саясатын қамтамасыз ету үшін жол картасын әзірлеп бекітуді және көпсалалы университет клиникаларын құру жұмыстарының аяқталуын қамтамасыз етуді тапсырды.