Бүгін Мәжілісте "Ақ жол" партиясының жаңа депутаты Олжас Нұралдинов ант берді, - деп хабарлайды Aqshamnews.kz тілшісі.
Парламент Мәжілісінің жаңа сессиясындағы алғашқы жалпы отырысы "Ақ жол" фракциясындағы өзгерістерден басталды. Мәжіліс спикері Ерлан Қошанов депутаттық өкілеттігін тоқтатқан Ержан Бейсенбаевқа атқарған еңбегі үшін алғыс білдірді.
"Ақ жол" демократиялық партиясының шешімімен әріптесіміз Нұржан Бейсенбаевтың өкілеттігі тоқтатылды. Барлық депутаттық корпус атынан Ержан Алмабекұлына атқарған жемісті жұмысы үшін алғысымызды білдіреміз", – деді Қошанов.
Спикердің айтуынша, Орталық сайлау комиссиясының қаулысымен "Ақ жол" демократиялық партиясы атынан Мәжіліс депутаты болып Олжас Нұралдинов тіркелді.
Жаңа депутат Конституцияға ант берді.
"Қазақстан халқына адал қызмет етуге, Қазақстан Республикасының тұтастығы мен тәуелсіздігін нығайтуға, оның Конституциясы мен заңдарына қатаң бағынуға, депутат ретінде өзіме жүктелген міндеттерге адал болуға ант етемін", – деді Олжас Нұралдинов.
Нұралдинов Мәжілістегі Қаржы және бюджет комитетінің мүшесі болып сайланды.
Еске сала кетейік, тамыздың аяғында "Ақ жол" партиясының төрағасы Азат Перуашев жуырдағы пленумда Ержан Бейсенбаев депутаттық өкілеттігін тоқтатқанын хабарлаған еді. Ол босап қалған депутаттық мандатты партияның Алматы қалалық филиалының төрағасы Олжас Нұралдиновқа беру туралы шешім қабылдаған.