Мәжіліс төрағасы Ерлан Қошанов Қазақстанда атом электр станциясын (АЭС) салудың маңыздылығын түсіндірді. Оның айтуынша, АЭС салу елдің тәуелсіздігін нығайту және экономиканы орнықты дамыту үшін қажет.
Түркістан облысында өткен "Жастар Рухы" республикалық жастар саяси лагерінде сөйлеген сөзінде Ерлан Қошанов Қазақстанның энергетикалық тәуелсіздігін арттыру және ғылым мен технологияны дамыту мақсатында АЭС салу қажеттілігін атап өтті.
Қазіргі уақытта Қазақстандағы энергияның 80 пайызы көмірден өндіріледі, бұл экологиялық тұрғыдан тиімсіз. Атом энергиясы осы мәселені шешудің тиімді жолы ретінде қарастырылып отыр. Ғалым Нұрхат Жәкиевтің айтуынша, АЭС құрылысы алдағы 100 жылда елдегі электр қуаты тапшылығын жоюға және жаңа жұмыс орындарын ашуға көмектеседі.
"Жастар Рухы" жастар қанатының мүшелері мен белсенділері АЭС салу бастамасын қолдап, оның елдің дамуы үшін маңызды екенін атап өтті. Сондай-ақ, жас ғалымдар әлемдік экономиканың және халықтың тең жартысы атом энергиясын пайдаланатын елдерде шоғырланғанын және Қазақстанның жаһандық дамудан шет қалмауы тиіс екенін айтты.
Ерлан Қошанов жастардың АЭС салу мәселесіндегі пікірін қолдап, оларды азаматтық ұстанымдарын белсенді түрде білдіруге шақырды. Ол АЭС салу мәселесінде негізгі шешімді халық қабылдайтынын, бұл Мемлекет басшысының басты ұстанымы екенін айтты. АЭС салу ғылым мен технологияны дамытуға, елдің бәсекеге қабілеттілігін арттыруға және тәуелсіздікті нығайтуға үлес қосады деп қорытындылады.