Қазақстанның Латвиядағы Елшілігі Латвияның Экономика институтымен бірлесе отырып, Латвия Ғылым Академиясында Қазақстан Республикасы Тәуелсіздігінің 30 жылдығына орайластырылған «Қазақстандағы реформалар – ниеттен іс-әрекетке» тақырыбында дөңгелек үстел өткізді, деп хабарлайды almaty-akshamy.kz «Хабар 24» сілтеме жасап.
ҚР Сыртқы істер министрлігінің хабарлауынша, Қазақстан Елшісі Тимур Пірімбетов қазіргі уақытта елде Президент Қасым-Жомарт Тоқаевтың басшылығымен жүргізіліп жатқан саяси және әлеуметтік-экономикалық өзгерістер туралы баяндама жасады. Аудиторияның назары тәуелсіз дамудың үш онжылдығы ішіндегі мемлекеттің негізгі жетістіктеріне аударылды.
Дипломаттың айтуынша, олардың әрқайсысы жас мемлекеттің егемендігін, ұлттық экономикасын, ішкі және сыртқы саясатын, халықаралық беделін нығайтуда маңызды кезеңге айналды. Тұңғыш Президент Н. Ә. Назарбаевтың елдің қалыптасуы мен бүкіл әлемде танылған мемлекеттік құрылыстың қазақстандық моделін қалыптастырудағы негізгі рөлі атап өтілді.
Дөңгелек үстел жұмысына Латвия Сеймінің бірқатар депутаттары қатысты. Атап өткенде, Улдис Аугулис – «Жасылдар мен Шаруалар одағы» парламенттік фракциясының басшысы және Қазақстан Парламентімен ынтымақтастық жөніндегі топтың жетекшісі, Арманд Краузе – Сыртқы істер жөніндегі парламенттік комитеттің мүшесі, Любовь Шевцова – Қазақстан Парламентімен ынтымақтастық жөніндегі топ басшысының орынбасары, сондай-ақ Иева Силина – Латвия Президентінің Ғылым және білім жөніндегі кеңесшісі, академик Байба Ривжа – Латвия ғылым академиясы төралқасының мүшесі, Янис Ванагс – Экономика институтының жетекші экономисті, Рига техникалық университетінің профессоры, Ритумс Розебергс – «Netkariga Rita avize» газетінің саяси шолушысы, Александр Видякин – Балтық-Қазақстан экономикалық ынтымақтастық қауымдастығының төрағасы және Латвия Экономика институтының өзге де сарапшылары.
Іс-шараның модераторы Латвия ғылым академиясы Экономика институтының директоры Нина Линде болды. Сындарлы пікірталас барысында У. Аугулис, А. Краузе, Л. Шевцова, Б. Ривжа және Я. Ванагс сөз сөйледі, олар Президент Қ. Тоқаевтың одан әрі демократияландыруға, азаматтық институттарды нығайтуға, мемлекеттік басқару тетіктерін жетілдіруге, қазақстандықтардың өмір сапасы мен деңгейін арттыруға бағытталған ауқымды жаңғыртылған күн тәртібін жоғары бағалады.
Сонымен қатар, Мемлекет басшысы алға қойған стратегиялық мақсаттар мен міндеттер әлемдік саясат пен экономиканың КОВИД-19 пандемиясынан кейінгі дамуының басымдықтарымен нақты үйлесетіні аталды.
Іс-шараға қатысушылар түрлі салаларда ортақ мүдделердің бар екеніне тоқталып, Қазақстан мен Латвия арасындағы ынтымақтастықтың қолда бар әлеуетін тиімді пайдалану қажеттігімен келісті.