Алматы қаласында шығармашылық индустрияны дамытуға бағытталған тағы бір ірі жоба қолға алынды, – деп хабарлайды aqshamnews.kz тілшісі.
Ұзақ уақыт бос тұрған бұрынғы трамвай депосының аумағы заманауи креативті орталыққа айналмақ.
Жаңа кеңістік өнер иелері мен жас кәсіпкерлердің басын қосып, қала тұрғындары үшін мәдени әрі қоғамдық өмірдің жаңа орталығына айналады деген сенім бар.
Оңтүстік астанада бұрынғы трамвай депосының орнында ауқымды креативті кластердің құрылысы басталды. Қала әкімдігінің мәліметінше, бүгінде жоба бойынша барлық негізгі шешімдер қабылданып, құрылыс жұмыстары қарқын алуда.
Жаңа кластер Гоголь мен Байтұрсынов көшелерінің қиылысында орналасқан бұрынғы трамвай депосының аумағында салынады. Жалпы көлемі шамамен 32 мың шаршы метрді құрайтын кешен шығармашылық индустрияларды дамытуға арналған толыққанды инфрақұрылым қалыптастыруды мақсат етеді.
Жоба аясында көпфункционалды концерт залы, түрлі мәдени және қоғамдық іс-шараларға арналған кең холлдар, шығармашылық мамандарға арналған студиялар мен шеберханалар, қазақстандық дизайнерлердің шоурумдары, заманауи өнер галереясы, қалалық іс-шаралар өтетін атриум, сондай-ақ креативті кәсіпкерлерге арналған кеңсе орындары салынады.
Сонымен қатар, кешен аумағында амфитеатр, жазғы сахна, саябақ аймағы мен балалар ойын алаңдары бой көтермек. Бұл тұрғындардың еркін демалып, мәдени шараларға қатысуына мүмкіндік беретін ашық қоғамдық кеңістікке айналады.
Қала әкімдігінің хабарлауынша, бұл жоба жай ғана аумақты абаттандыру емес, оның функционалдық бағытын түбегейлі өзгертуге бағытталған. Негізгі мақсат – адами капиталды дамыту мен креативті экономиканы қолдау. Бұрынғы депо аумағының ұзақ уақыт пайдаланылмауы осындай ауқымды жобаны әзірлеу мен келісу жұмыстарының күрделілігіне байланысты болған.
Жоба Қала құрылысы кеңесінің мақұлдауынан өтіп, мемлекеттік сараптаманың оң қорытындысын алған. Қазіргі таңда жобалық құжаттар толық бекітіліп, ескі ғимараттарды бұзу жұмыстары аяқталған. Енді құрылыс жұмыстары қарқынды түрде жүргізілуде.
Осылайша, бұрынғы трамвай депосының орны Алматының жаңа мәдени әрі шығармашылық орталықтарының біріне айналып, қаланың экономикалық және қоғамдық өміріне серпін бермек.
Бір айта кетерлік жайт, қала әкімдігі трамвай жүйесінен бас тартпайды. Қазіргі таңда жеңіл рельсті көліктің (LRT) алғашқы желісінің құрылысы басталған. Бағыт Абылай хан даңғылы арқылы өтіп, Төле би көшесімен батысқа қарай, одан әрі Момышұлы көшесінің бойымен солтүстік бағытта жалғасады. Ал жаңа трамвай депосы Алатау ауданындағы Индустриялық аймақ аумағында салынатын болады.
Креативті кластердің салынуы – Алматының мәдени және экономикалық әлеуетін арттыруға бағытталған маңызды бастамалардың бірі. Жаңа жоба шығармашылық саланың дамуына тың серпін беріп қана қоймай, қала тұрғындары үшін заманауи қоғамдық кеңістік қалыптастырады. Сонымен бірге, LRT жобасының жүзеге асуы Алматыдағы қоғамдық көлік жүйесін жаңғыртуға мүмкіндік беріп, қаланың тұрақты дамуына үлес қоспақ.
Роза РАҚЫМҚЫЗЫ