Алматыда көші-қон заңнамасын бұзған шетелдіктер жауапқа тартылды, - деп хабарлайды aqshamnews.kz Polisia.kz-ке сілтеме жасап.
Алматыда көші-қон заңнамасын бұзушылықтарды анықтау және көші-қон жағдайын тұрақтандыруға бағытталған "Заңсыз келуші - 2025" республикалық жедел-профилактикалық іс-шарасы жалғасуда. Шараның үш күнінде Қазақстанда болу және жұмысқа орналасу ережелерін бұзған 548 адам әкімшілік жауапкершілікке тартылды. Оның ішінде 527 шетел азаматы Қазақстан Республикасынан шығарылды. Елімізде болу ережесін бұзған 362 шетелдік, шетелдіктердің Қазақстан Республикасында болу тәртібін бұзған 164 қабылдаушы тарап, шетелдік жұмыс күшін заңсыз тартқан 22 жұмыс беруші жауапқа тартылды. ТМД елдерінен келген 282 шетел азаматының Алматыда уақытша болу мерзімі қысқартылды. Көші-қон заңнамасын өрескел бұзғаны үшін сот шешімімен 72 шетелдік Қазақстан Республикасынан шығарылды.
"Көші-қон жағдайын бақылау - біздің қызметіміздің басым бағыттарының бірі болып табылады. "Заңсыз келуші" ЖАІ аясында көші-қон полициясы, патрульдік қызмет, учаскелік инспекторлардан құралған мобильді топтар күн сайын қала көшелеріне шығады. Біз тек шетелдіктердің өздері тарапынан ғана емес, сонымен қатар Қазақстан Республикасының заңнамасын толық орындамайтын қабылдаушылар мен жұмыс берушілердің тарапынан да заң бұзушылықтарды анықтаймыз. Бұл кешенді жұмыс, қоғамдық қауіпсіздікті және Заң талаптарын сақтауды қамтамасыз етуге бағытталған", - деді, Алматы қалалық полиция департаменті көші-қон қызметі басқармасының бастығы Еркін Амантаев.