Көрші елдердегі жағдай Қазақстанның ішкі нарығына да әсер етіп отырады.
Өткен жылдың наурызында Ресейдегі бөлшек саудадағы дизель отынының бағасы Қазақстандағы бағамен теңескен. Нәтижесінде еліміздегі жанармайдың бағасы біршама арзандаған болатын, деп хабарлайды Аlmaty-akshamy.kz.
Жанармай саласы мамандарының айтуынша, баға теңескеннен кейін Ресеймен шекаралас жанармай станцияларында отынды сату көлемі азайғанын байқалған. Екі ортада жанармай сатушылар үшін Қазақстаннан жанармай шығару экономикалық тұрғыдан тиімсіз болды.
Алайда, араға бір ай салып, көрші елдердегі баға күрт көтеріліп, елімізде дизель өндіру көлемін арттырғанымен, күз айларында жанармай тапшылығы сезілген.
Биылғы жылы да бағадағы айырмашылық сақталып отыр. Өткен жылғы наурыз айымен салыстырғанда тұтыну көлемі 15%-ға артқан. Жағдай осы қалпында сақтала берсе, онсыз да шетел асып отырған қазақстандық дизельдің көлемі артып, жанармай тапшылығы 850 мың тоннаға жететінін айтады мұнай саласы мамандары. Бұған дейін тапшылықты жанармай өндіру көлемін арттыру арқылы жауып келген. Ал қазіргі уақытта отандық мұнай зауыттары максимальді режимде жұмыс жасап тұр екен. Шымкент зауытын кеңейткенше алдағы 6 жылда дизель өндіру көлемін арттыру мүмкіндігі жоқ екендігін айтады мамандар.
Осылайша, Қазақстан арзан отынмен басқа елдердің экономикасын субсидиялап отыр десе де болады.