Алматы қаласы бойынша Қылмыстық-атқару жүйесі департаментіне қарасты №11 мекемеде Президент тапсырмасы бойынша бекітілген Адам құқықтары және заң үстемдігі саласындағы іс-қимыл жоспарына сай сотталғандарды кәсіптік даярлау курстарын өзектендіру көзделген.
Жуырда «Жаңа әлем групп» ЖШС-нің өкілдері мекемедегі жазасын өтеп жатқан жасөспірімдерге дәнекерлеу бойынша қысқа мерзімді оқыту курсын өткізді. Онда осы кәсіптің қыр-сыры үйретілді. Теориялық және практикалық негізде өткен курс нәтижесінде 15 балаға осы мамандықты игергені туралы мемлекеттік үлгідегі куәлік берілді.
– Сотталған балалар жазасын өтеп шыққан соң, осы сертификатпен жұмысқа орналасып, табыс тауып, өмірін жаңа арнаға бұра алады. Мемлекет басшысы жариялаған «Жұмысшы мамандықтар жылы» осы саланың беделін арттырып, техникалық және кәсіптік білім беру жүйесіне жаңа леп әкелетіні сөзсіз. Біздің басты міндетіміз – сотталған балалардың осы мүмкіндікті тиімді пайдалануына дәнекер болу, – дейді №11 мекеме басшысы әділет полковнигі А.Сүлейменов