Көкшетауда автожуу орындарының бірінде қайғылы оқиға болды. Металл конструкцияны демонтаждау кезінде 18 жастағы жұмысшыны тоқ соғып, ол оқиға орнында көз жұмды. Ал оның кәмелетке толмаған әріптесі аурухананың жансақтау бөліміне түсті, – деп хабарлайды aqshamnews.kz тілшісі.
Алдын ала мәліметтер бойынша, жұмысшылар металл құрылымды бөлшектеу кезінде абайсызда электр берілісі желісіне тиіп кеткен. Соның салдарынан 18 жастағы жігіт алған соққыдан бірден тіл тартпай кетті.
Қасында болған жасөспірім шұғыл түрде ауруханаға жеткізілді. Дәрігерлердің айтуынша, қазіргі уақытта оның өміріне қауіп төніп тұрған жоқ, жағдайы тұрақты.
«Пациенттің жағдайы тұрақты, өміріне тікелей қауіп жоқ. Жағдайын динамикалық бақылау мен мониторинг жүргізу үшін ол бірнеше сағат бойы жансақтау бөлімінде болды. Қазіргі уақытта ол толық көлемде медициналық көмек алуда», — деп хабарлады Ақмола облыстық Денсаулық сақтау басқармасының баспасөз қызметі.
Орын алған қайғылы оқиға фактісі бойынша сотқа дейінгі тергеу амалдары басталды.