Кеудесі мен бетіне 22 рет пышақ сұққан: Павлодарда кәсіпкерді өлтірді деген күдікті Ресейге қашып кеткен

Павлодарлық кәсіпкерді өлтіргені үшін күдікті Ресейден экстрадицияланды, - деп хабарлайды aqshamnews.kz тілшісі. 
 
Қазақстан Республикасы Бас прокуратурасының қызметкерлері павлодарлық кәсіпкерді өлтірді деген күдікпен Қазақстан азаматын Ресей Федерациясынан экстрадициялады. Биыл 21 ақпанда жәбірленуші жұмысқа кетіп, кейін байланысқа шығуын тоқтатқан, осыған байланысты ол хабар-ошарсыз жоғалған деп танылған.

Соталды тергеп-тексеру барысында сол күні кәсіпкердің Павлодарда күдіктімен оның тұрғын үйінің ауласында кездескені анықталды. 

Қаржылай келіспеушіліктерге байланысты олардың арасында жанжал туындап, қаскүнем жәбірленушінің кеудесі мен бетіне 22 рет пышақ сұққан. Жәбірленуші сол жерде алған жарақаттарынан көз жұмған.

Қылмыстың ізін жасыру мақсатында күдікті марқұмның денесін және оның автокөлігін гаражына жасырып, кейін Қазақстаннан шығып, шетелге қашып кеткен. Биыл наурызда ол Ресей Федерациясының аумағында ұсталып, Қазақстан Республикасы Бас прокуратурасының сұрауы бойынша еліне экстрадицияланды.

Қазір күдікті тергеу изоляторына қамалды. 

Оған айып тағылған қылмыс бойынша 8 жылдан 15 жылға дейінгі мерзімге бас бостандығынан айыру түріндегі жаза көзделген.