Алматының әкімі Бақытжан Сағынтаев 25 маусым күні Орталық коммуникациялар қызметі алаңында баспасөз мәслихатына қатысып, БАҚ өкілдерінің сан түрлі сұрақтарына жауап беріп, қаламыздың дамуы мен экономика, экология, бизнес, оқу-білім, медицина саласындағы өзекті мәселелер мен атқарылған істерге тоқталды, болашақ жоспарлармен бөлісті.
Мегаполис басшысының атқарылған істер жөніндегі сөзін тыңдаған қала тұрғындары бүгін өз ойларын ортаға салды, деп хабарлайды Almaty-akshamy.kz.
«Алматы қаласы – алып мегаполис және бүкіл ел экономикасының локомотиві саналады. Қаланың алдына қойған мақсаты қаланың орталығы үшін ғана емес, бүкіл шаһар үшін де өзекті екенін мойындаймыз. Қала орталығы мен қала маңындағы өңірлер де тығыз байланысты. Бақытжан Сағынтаев Мемлекет басшысы ҚасымЖомарт Тоқаевтың тапсырмасы бойынша Алматы агломерациясының 4 пилоттық жобасын іске асыру басталғанын жеткізді. Қателеспесем, оларға экологиялық жағдайды жақсарту, көлік жүйесін дамыту және көлік моделін әзірлеу, төтенше жағдай тәуекелдерін азайту, шағын және орта бизнесті дамыту кіреді. Бұларды қай жағынан алып қарасаңыз да, әрқайсысының өз маңыздылығы бар әрі оның бәрі қаланы дамыту үшін керек», -деді М.О. Әуезов атындағы Әдебиет және өнер институтының директоры.
«Дәл қазір коронавирус кезеңінің барлық қиындығына қарамастан, қалада тұрақты әлеуметтік-экономикалық жағдайдың қамтамасыз етілуі маңызды. Бұл туралы қала әкімі нақты айтып өтті. Әлеуметтік саясат, ең алдымен, халықтың осал топтарын қолдауға бағытталған. Сондай-ақ, ол қала билігі қаланың сәулеттік келбетін жақсартуға бел буғанын алға тартты. Әрине, бұл ретте қала тұрғындарының пікірі ескеріледі. Өйткені, Алматы кәрі мен жастың есінде әртүрлі сақталған. Үлкен кісілер үшін шаһардың өткені құнды.
Білім саласына енгізілетін өзгерістер де қуантты. Қаламызда халықаралық дәрежедегі оқу орындарын ашамыз дегені де жақсы жаңалық. Себебі, жастарымыз сапалы білім іздеп шетел аспайтын болды. Айналып келгенде, мұның барлығы қала тұрғындарының әл-ауқатының артып, ұлттық мәдениетінің марқаюына түп- тиянақ болады деп сенеміз», -дейді Кенжехан Матыжанов.